منتديات زهور السودان



 
الرئيسيةالبوابةالتسجيلدخول

شاطر | 
 

 ست الدار بنت احمد جابر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
( ود البورت )
عضو نشيط
عضو نشيط
avatar

عدد المساهمات : 210
تاريخ التسجيل : 09/09/2009
الموقع : السودان / بورتسودان

مُساهمةموضوع: ست الدار بنت احمد جابر   السبت سبتمبر 19, 2009 12:15 am

( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
الطلب الفوقنا ورُح فكيت
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
نطهر راشد شهر إتنين حا
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
الكسرو عليهن ناس البلد
صدو يقلبو في إيديهن
عدمانين من إسم حكيم
للمشروع ولا خبيراً
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
لحوم .. والخواجة يصور ساكت قنبو قيلو شبعو
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
حرقت الدولاب لمن
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
عود ضرعاتكم ربي يخدر
بالي معاك يا الزين ود حامد
بالي هناك والشوق الشوق
شدير الجوف محروق خلى
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
نبقالك مشغولية ولا
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
.. وداعة الله وما تتوصى
أوعى البشغل والعربات والحيكومة السمها فاير

الدار بت أحمد جابر أم أولادك ست

ست الدار بت أحمد كيفك
جاني جوابك مفتوح شارع
جاني جوابك وانا بتصورفي ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتذكر
في المشروع وعمايل جعفر
ولما بكيت .. يا ست الدار
.. يا ست الدار أيوة بكيت
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟بجتك ؟ نوبتك ؟ عربك ؟ زنجك ؟
أنا مأزوم .. مأزوم .. مأزوم
فوق الطلحة الأمريكية يا خرطوم أزمني الصلبك
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
من شارع الله .. فوقي هجير والتحتي بقل أنا بندهلك
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
مع الإحتجو احتجينا
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
.. كان ما لمت أنا جاييكم وما ندمان لمت لمت

(تكتب بعد الحاصل والإتحصل ست الدار بت أحمد ) :
زيني الزين .. أب حالاً زين
جاني جوابك .. يا المبروك
أشوف الدنيا كويس وسابني
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
كيف؟ شغال بي فونيا؟ ينتج
عامل ينتج عشرين حتة
تلحقو منها قيمة إتنين
بغطوا المنصرفات ستة
سبعة.. تمانية .. تسعة بغطوا
أدها تسعة المنصرفات
الفايض .. بدخل وين؟ كل
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
توب مضغوط خفف مرتك
من التمسحبو كبابي الصين
خفض عمرك يا ابن الفانية
واجه ثانية وبي نظارتك
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
والتومات .. مرتاً دغري وغلباوية وعارف ام راشد
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو فرقو غيما الأمريكان ..
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا رطانة بكانا اتنين
صاقع كلو من اسماعين
هو الفسر لهن الشغلانة
ويا اسماعين
كان الديش شقّ مسيمعك بالجبخانة ما
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
.. ضلو الله الما ضلانا طالو الناس التريانين
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
راشد صبحت والدة نعجة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
الأتراح .. الزين الزين وفي
ما تشغل بالك
بس يا الزين كان درت مشورتي
كتالك ياهو كتالك اصلو
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
بحري .. كشك الشعلة .. الزين ود حامد الخرطوم .. الخرطوم
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
.. كل الاوراق .. راشد كيف كتب الزين
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

الرجوع الى أعلى الصفحة اذهب الى الأسفل
ريموو
عضو نشيط
عضو نشيط
avatar

عدد المساهمات : 103
تاريخ التسجيل : 31/08/2009

مُساهمةموضوع: رد: ست الدار بنت احمد جابر   الثلاثاء سبتمبر 22, 2009 8:53 pm

قصيدة روووعة يسلمو على المشاركة الحلوة
الرجوع الى أعلى الصفحة اذهب الى الأسفل
http://zhoor-alsudan.montadarabi.com
( ود البورت )
عضو نشيط
عضو نشيط
avatar

عدد المساهمات : 210
تاريخ التسجيل : 09/09/2009
الموقع : السودان / بورتسودان

مُساهمةموضوع: رد: ست الدار بنت احمد جابر   الأربعاء سبتمبر 23, 2009 12:12 am

يديك العافيه يا ريموووو وكل سنه وانتي و اعضاء المنتدي طيبا
الرجوع الى أعلى الصفحة اذهب الى الأسفل
عجوز لكن منقه
عضو جديد
عضو جديد


عدد المساهمات : 71
تاريخ التسجيل : 10/09/2009
العمر : 36
الموقع : فى الدنيا الواسعه

مُساهمةموضوع: رد: ست الدار بنت احمد جابر   الخميس سبتمبر 24, 2009 2:01 pm

مااااااااااااااااااااااك هين يابورتاوى
تسلم
الرجوع الى أعلى الصفحة اذهب الى الأسفل
( ود البورت )
عضو نشيط
عضو نشيط
avatar

عدد المساهمات : 210
تاريخ التسجيل : 09/09/2009
الموقع : السودان / بورتسودان

مُساهمةموضوع: رد: ست الدار بنت احمد جابر   الخميس سبتمبر 24, 2009 6:38 pm

يديك العافه يا حبوبه
الرجوع الى أعلى الصفحة اذهب الى الأسفل
ودالشايقية
عضو جديد
عضو جديد


عدد المساهمات : 3
تاريخ التسجيل : 02/12/2009

مُساهمةموضوع: رد: ست الدار بنت احمد جابر   الأربعاء ديسمبر 02, 2009 6:19 pm

سلمت يداك يا بورت وحقيقه كنت بفتش للقصيده واهو انت نورتنا ..تسلم وواصل..
ودالشايقيه..
الرجوع الى أعلى الصفحة اذهب الى الأسفل
( ود البورت )
عضو نشيط
عضو نشيط
avatar

عدد المساهمات : 210
تاريخ التسجيل : 09/09/2009
الموقع : السودان / بورتسودان

مُساهمةموضوع: رد: ست الدار بنت احمد جابر   الجمعة ديسمبر 04, 2009 1:08 am

تسلم يا ود الشايقيه وده فخر لينا
الرجوع الى أعلى الصفحة اذهب الى الأسفل
 
ست الدار بنت احمد جابر
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات زهور السودان :: المنتدى الأدبي :: قصائد أعضاء المنتدى-
انتقل الى: